علامات بتأكد إنك ماشى فى الطريق الصح

فى ناس كتيرة بتمر بمرحلة بتحس فيها إن اليوم مبيخلصش، بتستنى بفارغ الصبر إن الدوام يخلص عشان تروح. المهام اللى بتعملها مملة بشكل كبير، وبتحاول تلاقى أى طريقة تخلصها أو تتحايل إنها متبدأش فيها.

مفيش أى حماس حقيقى وهى بتعمل شغلها ده. بتستنى أجازة كل أسبوع بفارغ الصبر وبتعد الأيام لحد ما تيجى أجازه طويلة تريح فيها تماماً من الشغل.

دى مش مشكلة، لأن كلنا لا محالة هنمر بالمرحلة دى، بل، ولازم تمر بيها عشان توصل للطريق الصح

إنت عارف أيه المشكلة؟

المشكلة إنك بتهرب! بتروح البيت وتحاول بقدر الإمكان تنسى اللى حصل طول اليوم بإنك تضيع وقت فى مشاهدة التلفزيون أو السوشيال ميديا أو تطلع همك فى السجاير والأكل اللى كله زيوت ودهون

إنت بتزيد الطين بلة! المشكلة إنك فاهم إن ده الطبيعى، ده المسار بتاع الناس كلها.

بس إحنا متخلقناش عشان كده

لو معملتش حاجة عشان تغير الوضع ده، يبقى إنت إخترته، وملكش حق تلوم حد غير نفسك

إنت محتاج تتحمل المسئولية، لأن حقيقة مفيش حد هينقذك ولا هيغير لك وضعك غيرك إنت

وصدقنى ده الصوت اللى بيتردد جوايا لما بحس إنى مستسلم.

لو فى حاجة مش راضى عنها، إنت مش مضطر تقبلها

أنا مش عايز أضغط على نفسى وأروح شغل كارهه وأتحمل ناس أنا مش طايقها، مش عايز أضغط على نفسى مادياً عشان الأسعار عليت وأفضل طول عمرى أوفر تمن كوباية قهوه

الوضع مش هيتغير فى يوم وليلة

المشكلة مش فى إنك تقبل ده لفترة، المشكلة إنك متعملش حاجة، المشكلة إنك تقعد تشتكى وتقول ده الحال وهعمل أيه، المشكلة إنك تحط نفسك وتعيش فى دور الضحية

إنت مسئول عن نفسك

فى حالة وجود الحاجات اللى قلتلك عليها فى السطور الأولى، فأكيد إنت ماشى غلط، وأنا فضلت ماشى غلط، ولسنين

تعمل أيه؟

أيه اللى تاعبك بالظبط؟

شغلك؟

شكل جسمك؟

علاقتك الشخصية؟

البلد اللى إنت فيها؟

إنت محتاج تخصص وقت تقعد مع نفسك وتحط أيدك على موضع الألم، لأنك فى مبتقعدش مع نفسك بشكل مستمر، هتبقى تعبان نفسياً ومش مرتاح ومش فاهم ليه

إبدأ خطوات صغيرة

لو على سبيل المثال تعبان فى شغلك، هنا هتبدأ تبحث عن حاجات جديدة، خصص وقت للقراءة، إتكلم مع ناس وأسأل، والأهم إنك تجرب! حتى لو ساعة كل يوم، لحد ما تلاقى حاجة معينة إنت فعلاً حاببها

حط خطة للهرب

حدد موعد نهائى إنك تخلص الكورس الخاص بالحاجة دى، فى ساعتين يومياً بتوعك مينفعش حد ياخدهم منك، بعد ما تخلص، قدم علي شغل، حتى لو بمرتب أقل من اللى بتاخده، لو كنت عايز تبدأ شغل معين أونلاين أو حاجة خاصة بيك، مفيش حد هييجى يخدك من أيدك ويبدأ يعملها لك، لازم تفهم كده كويس

لو جسمك شكله مش عاجبك، مفيش حد هييجى يخدك فى عربيته يوديك الجيم، هتفضل فى الحالة دى لحد ما تكبر وصحتك تتدهور وهتندم

عارف المشكلة الأكبر أيه؟ إنك مستنى حد يقولك بالظبط تعمل أيه بالتفصيل، تذاكر أيه بالظبط عشان تشتغل، المشكلة مش فى المادة اللى هتذاكرها أو المجال اللى هتدخل فيه، المشكلة إنك معتمد على حد ييجى ينقذك

كل واحد مننا حياته مختلفه، ليه إهتمامات وظروف مختلفة. عشان أقول لحد يذاكر أيه بالظبط ويمشى على أى مسار، بدخل معاه إجتماع مدته ساعة وممكن ندخل أكثر من إجتماع عشان أفهم ظروفه ونحط خطة يمشى عليها، والموضوع مش هينجح إلا لو كان الشخص فعلاً عنده إستعداد من الأول يمشى على الخطة دى.

أنا مجرد بنقل له خبرتى، والتنفيذ عليه. حتى الكورس اللى شغال عليه، فهو مش نصيحة لحد يدخل فى أى مجال ما بالتحديد يبنى خبرة فيه. أنا بشرح إزاى يستغل الخبرات اللى عنده فى المجال اللى هو أصلاً إختاره. اللى عايز أقوله لك إنك محتاج تجتهد، محتاج تبقى عندك صبر وفراك زى ما بيقولو

نيجى لإجابة السؤال، هتعرف منين إنك ماشى صح؟

لو بتصحى متحمس ليومك

لو بتنسى الوقت وإنت شغال، بتنسى تاكل أحياناً

بتوقف شغل بس عشان تعبت جسدياً او ذهنياً

مبتنستناش أجازة نهاية الأسبوع بفارغ الصبر

الأيام كلها شبه بعضها لأنك مستمتع بكل يوم

لو مرتاح فى البلد اللى أنت فيها ومع الناس اللى بتتعامل معاها بشكل يومى

لو كانت إجابات الأسئلة دى كلها نعم، يبقى إنت ماشى صح، ولو كانت إجابة أياً منها لا، يبقى هدفك إنك تخلي إجابتها نعم

أشوفكم فى الإيميل الجى

أخوكم أحمد الحديدى

الإستشارات

كتاب إزاى تنشف وتضخم (للوصول لأفضل جسم لك منطقى)

كتاب دليل الهجرة لكندا (طريقة الحصول على الإقامة الدائمة)