إنت محتاج تقرأ الكلام ده

كان فى نيتى أعمل فيديوهات على اليوتيوب فى ٢٠١٧، لما بدأت أسافر وكانت حياتى بشكل ما فيها جديد وعندى خبرة ممكن أشاركها مع الناس، لكنى فضلت مأجل أكثر من سنتين

كل مرة كنت بنوى أبدأ كنت بقول هستنى لما أجيب كاميرا، ممعايش مايك كويس، هدرس خوارزميات اليوتيوب بحيث أفهم آلية عمله.

الحقيقة كل دى كانت أعذار خايبة، ومكنتش الأسباب الحقيقية

كنت بشوف ناس عمالة تنشر فيديوهات بشكل أسبوعى وعمال يتكلم نص ساعة فى الفيديو وفى الاخر جايب ٥٠ ولا ٦٠ مشاهدة، كنت بقول في نفسى الموضوع محرج جداً وخصوصاً لو حد عارف الشخص ده شاف الفيديو

دى طريقة التفكير التقليدية، طريقة التفكير اللى اتولدنا لقينا صحابنا أوهلنا بيفكرو بيها، الطريقة اللى بتخليك حرفياً متدخلش فى أى حاجة وتفضل محلك سر طول حياتك

…..أنا كنت خايف

الخوف والقلق كانت من كذا حاجة، أولاً كنت خايف من خيبة الأمل، لو نشرت الفيديو، ومجبش مشاهدات، هيبقى منظرى أيه؟ لو حد من صحابى ظهر له الفيديو عليه ٤٠ مشاهدة ومنشور من يومين هيقول عليا أيه؟

إبتديت أقرأ وأسمع لناس أكثر خبرة منى، مش فى اليوتيوب تحديداً ولكن فى الفلسفة وعلم النفس - مش النصب، ولكن الكلام المنطقى العاقل

السبب الحقيقى لتأجيلى لنشر الفيديوهات، مكنتش بسبب الكاميرا أو الميكروفون أو الوقت أنا كنت قلقان أمر بمرحلة خيبة الأمل اللى فى الأول، المرحلة دى هى اللى بتخلينا مبنبدأش فى أى حاجة عايزين نبتدى فيها.

بس مين نجح وممرش بالمرحلة دى لفترة؟ إلا لو كان عنده موهبة خرافية ودول نسبتهم قليلة

إنت بتعرف الشخص بعد نجاحه، مبتشوفش بدأ إزاى، مبتشوفش مراحل فشله وإحساسه بخيبة الأمل فى بداياته وغالباً بيمر بكل ده لوحده، لأن الناس مبتهتمش بيك إلا لما تنجح

فى حالة تأهلك نفسياً إنك تمر بمرحلة الظهور بالغباء، الإحساس بقلة الحيلة لبعض الوقت أو حتى الفشل، سميها زى ما تسميها، هتبدأ تحقق إنجاز

المرحلة دى هى مرحلة بديهية ومنطقية عشان تحقق اللى إنت عايزه، محدش بيجيبها من أول مرة

إنت محتاج تبدأ، تبقى عارف إنه عادى تفشل مرة وأتنين، تدخل فى مجال وتلاقيه مش بتاعك، تقدم على شغل ومحدش يرد عليك أو تبدأ بزنس إنت حابه وميجبش لك فلوس من الأول

ممكن قصتى مع اليوتيوب متكونش أكثر قصة تحمسك تبدأ، لكن أنا إستمريت فى نشر الفيديوهات ل ٤ سنين لحد ما بدأت المشاهدات تزيد بشكل ما، سنتين محاولات فى البزنس الاونلاين لحد ما قدرت أدخل أول جنية أو دولار من تقديم خدمة لناس مهتمة

مهما كانت الحاجة اللى نفسك تبدأها، أرجوك إبدأ وإعرف إن محدش بيجيبها صح من أول مرة، بس لو فضلت مستمر هتجيبها

شكراً