دهون أسفل البطن أو الدهون بشكل عام ليها علاقة مباشرة بحالتك الجسدية وكذلك إنتاجيتك.

لو كنت شخص بيحاول ينجز شىء، سواء كانت مذاكرة كورس ما أو بدء بزنس أو أياً كان، مينفعش ده يبقى سبب فى إهمال الأكل أو التمرين اللى بيأدى إلى زيادة الدهون واللى بالضرورة هيأثر بشكل مباشر على تقدمك تجاه الشىء اللى بتحاول توصله

زيادة الدهون فى جسمك بالظبط عاملة زى مرحلة سقوط الشعر، فجأة بتشوفها!

مبتشوفش بعينك المجردة التغيير. يعنى شعرك مثلاً بيبدأ فى التساقط، بس ممكن تشوف شعرة شعرتين واقعين قدامك لكن فجأة بتلاقى منطقة معينة فيها فراغ. كذلك الدهون، وإنشغالنا يومياً بيخلينا نتجاهل المؤشرات الأولى للمشاكل الصحية زى آلالام المفاصل اللى بتزيد تدريجياً مع زيادة الوزن وضيق النفس لما بتمارس أى مجهود عادى

بتكون بتشتغل على حاجة معينة وجسمك كله إلتهابات وإنت مش مرتاح وبتحاول تقاوم، زى ما تكون بتجرى وحاطط أوزان فى رجلك، أكيد الأوزان دى هتقلل من كفاءتك فى الجرى

الدهون الزائدة بتضغط على الجزء السفلى عند الرجل، وبتأثر على مستوى هرمون التيستيستيرون، غير إن الدهون بشكل عام معناها زيادة فى هرمون الإستروجين فى جسمك واللى مقابل ليه نقص فى هرمون التيستيستيرون واللى معناه (قلة تركيز، قلة فى الإنتاجية وعدم إستعدادك لأخذ أى مخاطرة فى إتجاه أهدافك)

ناهيك عن مشاكل القلب اللى ممكن تتعرض لها نتيجة إن الدهون بتمنع وصول الأكسجين والمواد الغذائية لمخك، وده سبب من أسباب إحساس ناس كتيرة بالإجهاد الزهنى خلال اليوم وبتحس فعلاً إنك مستهلك

الرسالة اللى عايز أوصلها، إنى متأكد إن إنك عايز تزيد إنتاجيتك، وعايز تحقق شىء فى حياتك، لكن كفاءتك مرتبطة بشكل مباشر بصحتك. صحتك أهم! لو لاحظت إن جسمك زاد، خصص وقت إنك تنزل الدهون دى أهم من أى شغل لإننا لو وقعنا، هنعمل أيه بالأهداف العملية

_{إن لبدنك عليك حق}

الموضوع صدقنى بسيط، لكن الناس بتكبر من الجهد المطلوب لتحقيق النتيجة وهو التخلص من دهون أسفل البطن أو الدهون بشكل عام، خلينا نحط خطوات لازم نمشى عليها

أولاً، زود حركتك خلال اليوم، الناس بتهمل بشكل كبير أهمية عامل الحركة، سواء كان مشى أو إنك تمارس حاجات عادية زى إنك تاخد السلالم بدل الأسانسير أو تمشى للمول بدل ما تسوق، أو تقف بدل ما تقعد، إنت تعرف الحاجات دى بتحرق سعرات أكثر من الجيم؟ الأنشطة دى كلها إسمها

NEAT- Non-exercise activity thermogenesis

وهى الأنشطة اللى بنمارسها عادى فى يومنا واللى الناس بتكسل إنها تعملها، على مدى أيام وشهور، هتحرق دهون من الأنشطة دى (طبعاً بجانب عامل الأكل)

الأنشطة دى بتحرق سعرات حرارية وبالتالى دهون أكثر من الجيم، لأنك بتقضى فقط ساعة فى الجيم بتحرق فيها معدل ٣٠٠-٥٠٠ سعر حرارى فى حين الأنشطة دى بتمارسها على مدار اليوم فممكن توصل إنك تحرق ١٥٠٠ سعر حرارى

صدقنى أعظم الأفكار بتيجي خلال المشى - إمشى

ثانياً، نضف أكلك، مش هقولك تحسب وجباتك فى اليوم بالسعر الحرارى، ولكن على الأقل خليك حريص على إختيار وجبات ومشروبات أقل فى السعرات الحرارية، لو هتاخد نوع مشروب فيه صودا بدون سكر، على مدى أيام هيساعدك أكثر إنك تنزل وزنك أكثر ما تاخد مشروب فيها سكر، الموضوع تراكمى

زود إستهلاكك من البروتين، البروتين بشكل عام بيحسسك بالشبع لأن فيه ألياف أكثر، ولما بقول لحد متستهلكش أكل فيه سكر كتير أو كربوهيدرات، مش عشان هتخنه بشكل مباشر، ولكن عشان الأكل ده بيلعب فى مستويات السكر، فهيزيد شهيتك

بشكل عام حاول يكون مستوى السكر فى جسمك منتظم عشان متحسش إنك عايز تاكل أكثر وعشان متحسش بالوخم والكسل

الأكل الصحى مش معناه بالضرورة إنه هيخسسك، ممكن تاكل أكل صحى يومياً زى فراخ ورز وتزيد، لأن المعادلة معادلة سعرات حرارية. ففكرة إنك بتاكل أكل صحى وخلاص غير كافية، لازم تراعى الكميات خصوصاً الكربوهيدرات والدهون حتى لو كانت صحية

ثالثاً، إتمرن تمارية مقاومة، بتحاول تزيد أوزان فى الجيم بشكل مستمر ، لأن ده مع زيادة كمية البروتين، هيحقق لك مكاسب عضلية هتساعدك تحرق دهون! لأن كل ما زادت الكتلة العضلية، زاد معدل الحرق

أنا شرحت الموضوع بالتفصيل من تنظيم أكلك وحساب السعرات وغيره فى كتاب ممكن تشتريه من هنا 

رابعاً، ودى أهم نقطة وهى الإستمرارية! إنت مبتلاحظش بداية الصلع بعينك المجردة، ومبتحسش إنك زدت دهون كتيرة إلا بعد تراكم كمية كبيرة من الدهون وكذلك مش هتحس بتغيير يومى وأسبوعى بعينك، لازم تستمر وتصبر على النتيجة زى ما محتاجين نصبر على أى شىء بنحاول نوصله

الدهون الزائدة مش بس بتثقلك جسدياً ولكنها بتثقلك نفسياً وبما إننا عايزين ننتج أكثر ونحقق أهدافنا، لازم أجسامنا تكون صحية

أشوفكم فى الإيميل الجى

أخوكم أحمد الحديدى