هل الذكاء الاصطناعي هيستبدل وظيفتك؟

هل الذكاء الاصطناعي هيستبدل وظيفتك الحالية أو الوظيفة اللي عايز تشتغلها ولا لأ؟ ده سؤال بيتسأل كتير، وفي ناس بتحدد خططها، سواء محاولة تطوير نفسها في شغلها أو حتى مذاكرتها، بناءً على نتائج بحثها عن السؤال ده. وده اللي هنتكلم فيه النهاردة.

مشروع AI Co-Scientist من جوجل

في مشروع تابع لجوجل اسمه AI Co-Scientist، وهو عبارة عن multiple AI agents بيقوموا بوظائف معقدة من التحليل والتعاون بشكل عام مع بعض، وكأنهم مجموعة علماء بيحاولوا يطلعوا بحلول لمشاكل وإيجاد أفكار لعلاج أمراض معينة بمساعدة عقاقير أو أدوية بالفعل موجودة. المشروع ده مبني على Gemini 2.0. قدروا من خلال المساعد ده إنهم يوصلوا لاقتراحات لـ3 علاجات لسرطان الدم، وكمان طرق لإيجاد مسببات تليف الكبد بسهولة. الإنجاز هو إنهم قدروا يعملوا ده في خلال ساعات، في حين إنهم لو مشيوا بالطريقة التقليدية، الموضوع ممكن ياخد 3 و4 سنين.

طبعًا الموضوع يتطلب تدخل ناس فاهمة عشان توجّه الـAgents دي، وكمان تراجع النتائج اللي ظهرت. فإنت محتاج تكون فاهم، مش هييجي واحد ما يعرفش حاجة يعمل ده. ونفس الكلام ينطبق على مجالات تانية.

هل الذكاء الاصطناعي هيستبدل الوظائف؟

في عدد كبير من الوظائف متوقع يتم استبدالها بالذكاء الاصطناعي، وفي وظائف تم استبدالها بالفعل، أو على الأقل جزء من مهامها. في وظائف صعب جدًا استبدالها، واللي بتتطلب تدخل بشري، زي مهن الطب مثلًا والمحاماة إلى حد ما. بالرغم من إنك تقدر تلاقي نصائح قانونية على ChatGPT أدق من اللي بتاخدها من ناس المفروض فاهمة في القانون، ولكن لو في مشكلة فعلاً، أكيد بنرجع لشخص فاهم.

كذلك مهن حرفية زي السباكة والنجارة وغيرها، لأن في أغلب الوقت، أعتقد تكلفة استخدام الذكاء الاصطناعي في عمل وظائف زي السباكة مثلًا هتكون تكلفتها أعلى من استخدام البني آدم.

بالنسبة للوظائف المكتبية زي المحاسبة والبرمجة مثلًا، فهي بدأ فعلاً استبدالها، وفي جزء مش قليل من المهام الوظيفية لها تم استبداله. وأنا شخصيًا بوفر وقت مش قليل لما بستخدم Grok أو ChatGPT في شغلي كمبرمج. هيبقى ليك مكان لو كانت وظيفتك من النوع ده في حالة وجود حاجتين: إنك مبدع بشكل ما، وملم بأكثر من حاجة وبتقدر تربطهم ببعض.

الإبداع البشري والذكاء الاصطناعي

خليني أشرح لك، وحاول تركز معايا. الذكاء الاصطناعي متفوق في نقطة قدرته على ملاحظة الأنماط، تحليل البيانات، وكمان قدرته على استخراج بيانات بناءً على المدخلات الكتيرة اللي اديتها له. الذكاء الاصطناعي معندوش خبرة زيك، أو مر بتجارب حياتية زي اللي عشتها. أنا قريت كتب كتيرة، وأثرت بشكل ما في طريقتي كتابتي لسكربتات اليوتيوب، واعتمدت على الذكاء الاصطناعي في ترتيب أفكاري، وكمان استخلاص معلومات جديدة. بس الذكاء الاصطناعي ميقدرش يفيدني في نقل تجاربي اللي عيشتها من وأنا صغير خلال فترة الدراسة، ولما اشتغلت موظف، والعقبات اللي مريت بيها. ميقدرش ينقل تجربتي في شرح المواقف الصعبة اللي مريت بيها، سواء الـtrauma أيام الدراسة، أو صعوبة الأيام اللي مريت بيها ما كانش معايا فلوس، أو خلال الضغط أيام الشغل وعدم النوم بسبب مشكلة مطلوب مني إني أحلها.

في بحث اتعمل سنة 2004 اسمه The Creative Mind عن موضوع الذكاء الاصطناعي وفكرة الإبداع. وكان القائم عليه عالم اسمه Boden، قال إن الإبداع بشكل عام ينقسم لـ3 أنواع:

• Combinational: خلط الأفكار الموجودة.
• Exploratory: توسيع الأساليب المعروفة.
• Transformational: إعادة تعريف النماذج، زي آلة الحوسبة بتاعة Alan Turing.

إزاي تبقى موظف مطلوب دايمًا باستخدام الذكاء الاصطناعي؟

لو أنا موظف، أعمل إيه عشان أبقى مطلوب دايمًا وأستغل الذكاء الاصطناعي في تسهيل شغلي ومضاعفة إنتاجيتي؟ هقولك خطوات عملية ممكن تعملها، وتنطبق على أي وظيفة، وهقولك أنا بطبقها إزاي بشكل شخصي:

1. محتاج تحدد المهام الروتينية اللي بتعملها بشكل يومي، وبتحسّك بملل، بتحس إنك زي الآلة وإنت بتعملها.
2. تحدد الأدوات الخاصة بالذكاء الاصطناعي اللي هتخليك تعمل automation للمهام دي، أو على الأقل تقلل الوقت اللي هتحطه.
3. تتعلم تشتغل على الأدوات دي، وغالباً مش هتحتاج تكتب كود.
4. بعد كده تعمل automation.
5. تستغل الوقت اللي هتوفره بحيث تطور مهاراتك في شغلك، أو تعمل الحاجة اللي هقولك عليها كمان شوية، واللي أنا بستثمر فيها وقت طويل حاليًا.
6. تبقى على إطلاع دايمًا بأخبار الذكاء الاصطناعي، وتشوف ممكن تستغله في إيه.

مثال عملي: إزاي بستخدم الذكاء الاصطناعي في البرمجة وصناعة المحتوى؟

1. على سبيل المثال، كان عندي task، كل موظف بيقدم طلب إحصائية لبيانات معينة، كنت بعمله جدولة بشكل أسبوعي. عملت job بتصحى كل يوم تشوف الطلبات الجديدة، بتعمل run لـprocedure بيجدول الطلبات، وبيراعي عطلات نهاية الأسبوع والأجازات الرسمية.
2. بستخدم الذكاء الاصطناعي في تحليل البيانات، إيجاد المشاكل في كود فيه آلاف من السطور، كان بياخد مني وقت في عمل له debugging.
3. كنت بكتب إيميلات للقائمة البريدية، دلوقتي عملت لها sequence بحيث أي حد يشترك يوصله إيميل كل 4 أيام.
4. كل يوم كنت بدخل مثلاً أقرا أخبار بحيث أبقى على إطلاع بأخبار الهجرة والتيك، عملت workflow على n8n بيلخص الأخبار ويبعتها لي واتس، وممكن أنزل منها بوستات على X وThreads.

صناعة المحتوى: استثمار المستقبل

لو إنت موظف، إنت في نعمة ومش محتاج تسيب وظيفتك. إنت محتاج تستغل أكبر ميزة إحنا محظوظين إنها موجودة حاليًا، وهي السوشيال ميديا. في 2013 وما قبلها، كان الوقت المثالي للاستثمار في البيتكوين، وفي ناس كتيرة ندمت إنها مستثمرتش من بدري. الناس اللي اشترت بيتكوين بدري جمعت فلوس. صناعة المحتوى أنا شايفها زي البيتكوين، واللي بدأ أو هيبدأ فيها حاليًا هيجمع فيما بعد اللي أهم من الفلوس، وهو social capital، اللي أهم بكتير من الفلوس لأنها هي اللي هتجيب فلوس لك فيما بعد.

في ناس كتيرة واخدة نظرة عن صناعة المحتوى إنه مضيعة للوقت، في حين إنه حرفيًا بيغير حياة ناس. مش لازم بس على فكرة يكون ماديًا. صناعة المحتوى نفسها ممكن تغير حياتك نفسيًا 180 درجة. الشخص اللي سلك المسار التعليمي التقليدي، وتم فرض مواد معينة عليه بشكل مستمر، وكان مجبر إنه يذاكرها، هو اللي هيحس بالموضوع ده. فكرة إنك قدرت على تحديد المواد اللي عايز تستهلك محتوى عنها، وقرارك إنك تشارك رحلة تعلمك مع الناس، هيسد شيء أنا وإنت كنا مفتقدينه خلال مراحل تعليمنا.

ميزة الموظف في صناعة المحتوى

لو إنت موظف، إنت عندك ميزة كبيرة، وهي إن في خبرة تقدر تنقلها في محتواك، إزاي وصلت للمستوى اللي إنت فيه. وتقدر فيما بعد تستغل المتابعين إنك تطلع خدمات مدفوعة. صناعة المحتوى بتديك فرصة إنك متحكم في اللي بتتعلمه، ولو بنيت لنفسك علامة تجارية، تقدر تدخل في أي شيء إنت مهتم بيه، لأنك عندك ثروة، وهي الجمهور اللي بيتابعك.

في ناس حاليًا بتعمل فلوس من صناعة المحتوى بالذكاء الاصطناعي، وفلوس مش قليلة، ولكن الذكاء الاصطناعي ميقدرش يعمل علامة تجارية، ميقدرش يستبدل إبداعك وقدرتك على نقل خبراتك مع الناس. صناعة المحتوى في حد ذاتها، وظهور كل واحد على منصات التواصل الاجتماعي ينقل خبراته بشكل مجاني للناس، هو شيء مفيد لكل الناس. وأنا واخدها كرسالة بحاول أنشرها، لأن خسارة إن في ناس كتيرة عندها خبرة مش طبيعية ومبتفدش بيها الناس، لأنها معتقدة إن صناعة المحتوى مش ليها. والموضوع أسهل مما تتخيل.