إزاى تعمل عضلات بطن وإنت موظف

اللى متابعنى من فترة عارف إنى بشتغل مبرمج، بجانب صناعة المحتوى والتدريب الأونلاين. موضوع إن يبقى شكل جسمى متناسق وإنى أقدر ألبس اللى يعجبنى، كان شىء مهم ولكن تحقيق معادلة إنى أركز فى شغلى وفى نفس الوقت أواظب على التمرين والأكل كانت بالنسبة لى شبه مستحيلة زى ما فى ناس كتيرة فاكره

أنا مستسلمتش بسهولة، حاولت أحل المعادلة دى، بإنى أحط إيدى على موضع المشكلة، وهى إنى كنت رفيع، فعرفت إنى لازم أزود أكلى ولكن حصلت مشكلتين

المشكلة الأولى

.الإحساس بالوخم وإنعدام الطاقة فى نص اليوم

إبتديت أقرا لناس كتيرة، وللأسف المحتوى العربى فقير جداً فى المعلومات الخاصة بالتغذية وعلاقتها بالهرمونات، لحد ما سمعت مقطع لأندرو هيوبرمان، وسعتها تغير تفكيرى، وعرفت المشكلة

بسبب محاولاتى المستمرة إنى أزود وزنى، كنت باكل كتير، تحديداً الكربوهيدرات. الجسم لما بيعالج النشويات، بيأثر على مستويات الطاقة وكمان مستوى السكر فى الدم فبيسبب زيادة مفاجأة نسبة السكر فى جسمك، وجسمك بعدها بيفرز كمية أنسولين كبيرة عشان يستغل الجلوكوز كمصدر طاقة.

الزيادة دى بتسبب هبوط فى معدل السكر فى الدم اللى بيحسسك بالوخم والإرهاق بجانب زيادة هرمون السيروتونين اللى بيحسسك بالراحة وكمان الميلاتونين اللى بيحسسك إنك عايز تنام

الحل

لما فهمت الموضوع ده، بدأت أستهلك كمية كربوهيدرات فى ساعات متأخرة من اليوم، ببساطة الوقت اللى معنديش مشكلة فيه إنى أحس بالوخم أو إنى عايز أنام، وهو الوقت اللى بعد التمرين على الساعة ٩ أو ١٠ بليل، وبدأت أركز على إستهلاك أغلب سعراتى الحرارية من البروتين والدهون الصحية فى بداية اليوم

المشكلة التانية

جسمى زاد عضلات، لكن بطنى ووسطى زادو! والسبب فى كده هو جهلى بعدد السعرات اللى المفروض أستهلكها والأكل بشكل عشوائى، بالتالى زدت دهون. مكنتش فاهم بشكل كافى مبدأ عمل عجز سعرات James Smith حرارية، لحد ما إتفرجت على فيديو ل

الحل

بدأت أحسب السعرات فى الشهور الأولى حتى قدرت أبنى عادة إنى آكل ما يكفينى من السعرات بدون ما أزيد دهون بشكل كبير، ولكن حصلت مشكلة تانية! وهى إنى إبتديت أجوع، فإحتجت إنى أزود أكلى

فهمت إنى لازم أزود حرق السعرات، بدأت أتمرن بشكل أطول فى الجيم، وأزود عدات زى ما ناس كتيرة فاهمه إن دى الطريقة المثالية لحرق السعرات وهذا مفهوم خاطىء لأنك بالطريقة دى مش هتكسب شىء غير إنك ممكن تخسر عضلات ومش هتخس دهون بشكل الكافى

NEAT (Non-Exercise Activity Thermogenesis) سمعت لأول مرة عن كلمة إسمها

وهى الطريقة اللى بتحرق بيها أكبر قدر من السعرات من خلال ممارسة أنشطة يومية عادية زى المشى للشغل بدل ما تاخد مواصلة، أو المشى للسوبر ماركت أو المسجد. ممكن تكون من خلال تنضيف البيت، إنك تلعب مع أولادك أو حتى إنك تقف بدل ما تقعد. لما بتعمل الحاجات دى بشكل مستمر، بتحرق سعرات حرارية ومع الوقت بتحس بفرق، ولك أن تتخيل إن ده أفيد من إنك تلعب كارديو فى الجيم بشكل مكثف اللى هيأدى فى بعض الأحيان إنك تخسر عضلات

فى نسبة كبيرة من الموظفين عندها كرش لعدة أسباب

السبب الأول

إنها بتفكر زى ما كنت بفكر، إنها عشان توصل إنها تعمل عضلات بطن أو توصل لفورمة شكلها كويس فى اللبس، شىء مستحيل بسبب ضيق الوقت، لأنها متخيلة إنها محتاجه وقت أكثر من الوقت اللى فعلاً محتاجاه . اللى إنت محتاجه حرفياً ٥-٦ ساعات تمرين إسبوعياً وتقسيم سعراتك الحرارية على ٣-٤ وجبات وإختيار الأكل بشكل ذكى

السبب الثانى

عدم فهم المبادىء الأساسية للتغذية، المبادىء اللى لازم تمشى عليها عشان تشوف نتيجة وإلا هتضيع مجهودك حرفياً. خلينى أديك مثال بسيط. عشان تخس لازم تعمل عجز سعرات حرارية بمعنى إنك بتدخل جسمك سعرات أقل من اللى محتاجها، فلو إفترضنا إنك محتاج ٢٠٠٠ سعر حرارى يومياً عشان يفضل جسمك زى ما هو، فعلشان تخس، هتعمل عجز ٥٠٠ سعر حرارى، فهتاخد ١٥٠٠ سعر يومياً.

على نهاية اليوم السابع، هتبقى عملت عجز ٣٠٠٠ سعر(٥٠٠*٦). كثير من الناس بتحب تكافىء نفسها، فبتاخد وجبة مفتوحة، والأسوء إنها ممكن ممكن تاخد يوم كامل مفتوح، تاكل كل اللى نفسها فيه.

فلو خدت وجبة بيتزا، غالباً هيكون فيها ٢٥٠٠ سعر تقريباً، وطبعاً هتختم بعدها بحلويات، فكده تبقى خدت فوق ال ٣٠٠٠ سعر حرارى اللى حرمت نفسك منهم طول الإسبوع!

عشان السبب ده بالتحديد، عملت كتاب - إزاى تنشف وتضخم

الكتاب شرحت فيه أساسيات التغذية اللى المفروض تبقى عارفها عشان تعبك ميروحش على الفاضى

لو محتاج الكتاب ممكن تحمله من هنا

ولو كنت حابب تتمرن معايا إونلاين ممكن ترد فقط على الإيميل وتقولى إنك مهتم

السبب الثانى

عدم الإستمرارية! بداية ملاحظة نزول الدهون بعينك المجردة بياخد وقت، ولازم تفهم كده كويس وتتعود تحط المجهود المطلوب منك لمدة طويلة بدون النظر لجسمك بشكل يومى فى المراية

فكرة وصولك لشكل جسم كويس، مش عشان بس صحتك، أو عشان يبقى شكلك حلو فى اللبس، لكن إلتزامك بالتمرين لعدد محدد من أيام الأسبوع، وتحكمك الأكل اللى بتدخله جسمك، وبالتالى وصولك لجسم حابب تشوفه. بيخليك تحترم نفسك، ويبقى عندك ثقة إنك قادر تحقق اللى عايز توصله

الموضوع صدقنى بيأثر بالإيجاب على كل حاجة فى حياتك

إبدأ لو مبدأتش ولو كنت بدأت، أرجوك خليك مستمر

أشوفكم فى الإيميل الجى

أخوكم أحمد الحديدى