- Ahmed Alhadedy's Newsletter
- Posts
- إنت محتاج المهارات دى، أكثر من المهارات التقنية
إنت محتاج المهارات دى، أكثر من المهارات التقنية
Ahmed Alhadedy
February 03, 2025
فى مهارات عرفت إنها مهملة تماماً، محتاجينها أكثر من المهارات التقنية! بمعنى إننا محتاجين يكون عندنا صفات هتزود لا محالة من نجاحنا، ومهما كنت شاطر فى المهارات التقنية ومميز فى شغلك أو البزنس بتاعك، هتلاقى فى صعوبة فى ملاحظة تقدم فى حالة عدم وجود حاجتين.
أولاً، حس المسئولية وثانياً الذكاء العاطفى
خلينا نتكلم عن كل جزء بالتفصيل
الجزء الأول
جزء المسئولية إتكلمت عليه فى كذا فيديو سابق على اليوتيوب، والموضوع ده حسيته بعد التخرج وبعد الشغل لسنوات فى شركات كبيرة، والمهارة ده بتقل وتقريباً بتتلاشى تماماً فى حالة شغلك فى شركة معروف فيها المسئوليات بشكل كبير، يعنى بيبقى ليك دور محدد ومعروف إنت بتعمل أيه.
تقريباً مبتفكرش فى أى جوانب أخرى بعيدة عن شغلك. على عكس مثلاً لما بتشتغل فى شركة صغيره، بداعى ظروف الشغل بتضطر تتطرق لجوانب تانية ملهاش علاقة بشغلك
جزء المسئولية بيبدأ من أيام الدراسة، بتعتمد على مدرسك يقولك تعمل أيه، لحد ما تخرج وتشتغل، وبتعتمد بشكل كامل على مديرك يديلك شغلك، هتفكر إزاى، هتتعامل مع مشكلة إزاى. أحياناً بتوصل إنه بيقولك ترد على إيميلات إزاى وتقول أيه
الموضوع عرفت تبعاته فيما بعد، إنى مش قادر آخد قرار بخصوص زيادة دخلى مثلاً، أخطط لحد هدربه اونلاين، أنظمله يومه، أخليه يلتزم. لو ملتزمش أتعامل معاه إزاى. لو وقع فى مشكلة زى إصابة مثلاً هعمل ايه.
الموضوع بيكبر بعد كده إنك بتعتمد على شخص بيتحكم فى مصدر دخلك ووقتك وهو اللى بيحدد إذا كان دخلك هيزيد ولا لأ بناء على تقييمه السنوى لك، هو اللى بيحدد إذا كنت هتاخد أجازة ولا لا
هل معنى كده إنك تسيب شغلك وتاخد مخاطرة؟
مش ده اللى أقصده، بس المهارة دى ممكن تنميها بطريقتين
الأولى
وإنت فى شغلك، إنك تتحمل مسئولية أكثر، تحاول (تحشر) نفسك فى حاجات جديدة، طبعاً تبقى عارف إن فى نتيجة مقابل التعب ده سواء كانت خاصة بزيادة مهاراتك أو زيادة دخلك
التانية
إنك تبدأ شىء يكون بتاعك، حاجة يكون فيها تحدى تدى معنى ليومك، محتاج حاجة تكون مسئول عنها بشكل كامل، إنت المدير، واللى بتعين الناس تعملك شغل، وإنت اللى بتابع العملاء وإنت المسئول بشكل كامل عن مادياتك.
بتتحمل مسئولية نفسك وبتشتغل إنك تزود ربحك بشكل مستمر، لأنك مسئول عن نفسك ومسئول عن اللى حواليك. مش مستنى مدير تكلمه على زيادة وتستنى رده ولما يرد يساومك فى نسبة الزيادة
! إبدأ شىء السنة دى نفسك تبدأه، مش السنة دى، الشهر ده
الجزء التانى
وهو الذكاء العاطفى
فى بحث عمله طبيب نفسى إسمه دانيال جولمان، وإختبر فيه عينه كبيرة من ناس ناجحة فى ريادة الأعمال أو حتى كانو موظفين، ووصل إن ٩٠٪ من الناس الناجحة عندهم ذكاء عاطفى وبيقدرو يتحكمو فى شعورهم بشكل كبير حتى لو مكنوش أشطر ناس تقنياً
Journal of Organizational Behavior فى كمان دراسة إتعملت فى ٢٠١٦ إسمها
ووصلو إن الموظفين الأذكى عاطفياً بيكسبو بمتوسط ٢٩٠٠٠ دولار أكثر من الأشخاص الأقل ذكاء عاطفى بصرف النظر عن مهاراتهم التقنية
إيه معنى إنك تكون ذكى عاطفيا؟
معناها إنك تبقى قادر تتحكم فى شعورك، تتحكم فى نفسك وتعرف تفصل مشاعرك عن شغلك، تبقى قادر تتعامل مع الناس بشكل ذكى فى إطار الشغل بصرف النظر عن رأيك الشخصى فيهم، الموضوع ده أنا نفسى حتى الان بحاول أشتغل عليه، وصدقنى كل ما إتطورت فيه، كل ما فرص إنك تتعرف على ناس أكفأ هتزيد
اللى فى مجال العمل بقاله فترة وإشتغل فى شركات كبيره، فاهم كويس إن الموضوع مش مهارات تقنية وإنك تكون شاطر فى شغلك فقط، الموضوع ليه إعتماد كبير على ذكاءك العاطفى، علاقاتك وقدرتك على تحمل المسئولية والمخاطرة أحياناً إنك تدخل فى تحديات جديدة، لأن المخاطرة قدامها مكافئة أكبر
أشوفكم فى الأيميل الجى
أخوكم أحمد الحديدى
الإستشارات
دليل الهجرة لكندا
كتاب إزاى تنشف وتضخم للوصول لأفضل شكل لك
فى حالة وجود صعوبة فى الوصول لأى من الخدمات، ممكن ترد على الإيميل وتوضح المشكلة