الدوبامين السريع اللي بيدمّرك تقريباً آخر سنتين بقيت مهتم أكتر بموضوع الدوبامين وتأثيره على المزاج العام، وحياتنا عموماً. الموضوع زادت أهميته بالنسبة لي، لأن لاحظت إن مدة انتباهي قلت عن الأول. أيام الكلية مثلاً… كنت أقدر أقرأ كتاب كامل، دلوقتي وصلت إني مبستحملش أكمل صفحتين تلاتة. حتى لو هتفرج على فيلم، مبقدرش ممسكش الموبايل. كمان توتري زاد! الموضوع انعكس على نومي، بقيت بنام ساعات أقل، الاستشفاء العضلي بقى أبطأ… الموضوع مكنش بس مرتبط بالأجهزة، لكن حتى بالنساء… (ومتفهمنيش غلط 😅). وأنا صغير، كان ليا صديقات. كنت بتكلم معاهم من وقت للتاني على الواتس أو الإنستجرام، وأحياناً كنا بنخرج. لكن لما كنت بقعد أذاكر كورس أو بشتغل على حاجة، مكنتش بقدر أكمل نص ساعة إلا لما أمسك الموبايل وأرد على الرسائل. الحقيقة، الفترة اللي كنت بتعرف فيها على بنات حتى من غير خروج، كل شيء كان بيزداد سوء. تركيزي أقل، إنجازي بينزل، ومستوايا عموماً بيتدهور. يمكن اتكلمت كتير عن موضوع الأجهزة، وخصوصاً في حلقة الاحتراق الذهني:
رابط الحلقة على يوتيوب لكن عايز أنقل ليك تجربتي مع موضوع النساء. مش هكلمك عن الحرمانية، لأن أنا وأنت عارفين إنه حرام. لكن هو فعلاً مبيضرش حد غيرك. وقتك في الدنيا محدود. الدقيقة اللي بتضيعها في كلام مع واحدة مبتتعودش. الكلام نفسه طاقة. ينفع تستغلها في حاجة مفيدة… أو حتى إنك ترتاح. وفي نفس الوقت، عمري ما فهمت اللي متجوز أو خاطب وبيكلم بنات في الخفاء بعيد عن زوجته أو خطيبته. التفسير الوحيد إن الشخص ده فاضي. معندوش هدف يحط فيه طاقته. فبيضطر يدور على أي طريقة يشتت نفسه بيها… بجانب طبعاً بعده عن ربنا. فكر فيها: إنت محتاج تخبّي التليفون، تعمله باسورد، تكذب عشان شريكتك متعرفش… ده مجهود لوحده! الموضوع محتاج “شغل بعد الضهر” زي ما بيقولوا 😅 اللي بيحصل إنك بتطارد الدوبامين. الدوبامين اللي بيتفرز من معرفتك لشخص جديد بيكون أعلى بكتير من الدوبامين اللي بيطلع وأنت بتكلم شريكتك اللي عارفها من شهور أو سنين. وده بيدخلك في إدمان. تتعرف على واحدة… تتعود عليها… بعد كده دماغك تدور على واحدة جديدة. وهكذا. وفي الآخر بتدمر علاقتك، وبتدمر مستقبلك. المشكلة إننا ساعات نظرنا بيبقى قاصر. مش بنشوف غير اللحظة. لكن صدقني اللي بيعمل كده بيدمّر نفسه. الشيطان هييجي يوسوس لك تعمل الغلط. لكن فكر دايماً في التبعات. (والكلام ليا قبلك). متدمنش الدوبامين السريع. الدوبامين اللي بيدمرك. نتكلم في الإيميل الجاي. وبالمناسبة، لو حابب تتكلم معايا… أنا نزلت سعر الاستشارات. ممكن تحجز اجتماع من هنا: thehadedy.com/consultancy | 