لو قدرت تتعلم أي مهارة بشكل أسرع من غيرك في الوقت الحالي فلا محالة إنت بتزود من فرص نجاحك سواء في الحصول على وظيفة أو حتى بدء بزنس خاص بيك وبالتالي تحسين جودة حياتك

ليه في ناس بتتعلم بسرعة؟

في ناس عندها موهبة طبيعية وبتقدر تتعلم أي حاجة بسرعة نتيجة لإن مخها مختلف عن أشخاص تانية، على سبيل المثال في ناس بيبقى عندها myelin أكثر من ناس تانية وهي طبقة بتبقى حوالين الخلايا العصبية زي الفايبر أو الطبقة اللي على سلك أي شاحن وبيسرع من وصول الإشارات بشكل عام لجميع أنحاء الجسم بتبقى استجابتك أسرع. في حالة عدم وجود هذا ال myelin بيبقى استيعابك أبطأ بتحصل مشاكل عمومًا خاصة برد فعلك تجاه أي حاجة وبتوصل لمشاكل عقلية.

في واحد اسمه kim peek وده اللي اتعمل عنه فيلم rain man وده كان عنده قدرة رهيبة على تذكر أي حاجة بيقراه، كان بيفتح كتاب ويقرا صفحتين في نفس الوقت في خلال ثواني ويقدر يتذكر كل كلمة قراها بما فيها النقط والفواصل.

لازم تكون عبقري؟

الخبر الكويس إنك مش لازم تكون بالفطرة عندك قدرات خارقة عشان تتذكر اللي بتقراه أو تتعلم بشكل أسرع، حتى للبني آدم الطبيعي في طريقة للتدريب على كده التعرض لكم معلومات مش طبيعي في الوقت الحالي وكثر الأدوات بيخلي الشخص اللي عايز يطور من نفسه عايز يستهلك أكبر قدر من المعلومات في أقل وقت لأنه بيحس إنه في سباق مع أشخاص تانية بتحط بشكل مستمر إنجازات ليها على لينكد إن من شهادات وشغل وغيره. وأول خطوة لازم تعملها هو إنك تهدى، وتطلع نفسك بره المقارنة.

لما بتستسلم للضغوطات دي بتلاقي نفسك بتستهلك معلومات بشراهة زي ما بتكون جعان وبتاكل أكل بكمية كبيرة جدًا وفي النهاية بطنك بتوجعك، أو بتنسى!

إحنا بننسى ليه؟

من أشهر الدراسات اللي اتعملت واللي بتوضح كمية المعلومات اللي بننساها هي دراسة عملها Hermann Ebbinghaus ووصل لإننا بننسى ٥٦٪ من المعلومات بعد ساعة من تعلمها و ٦٦٪ بعد يوم و ٧٥٪ بعد ٦ أيام، بعد شهر تقريبًا بيتبقى لنا ١٠ ٪ بس من اللي حاولنا نتذكره وده اللي بيعمله معظم الناس لإنهم مبيمشوش على استراتيجية واضحة في التعلم

معظمنا بيذاكر وكأنه بيسابق الوقت عشان يلحق يخلص ويوصل لمستوى الشخص اللي بيقارن نفسه بيه، فبتوصل لمرحلة الإجهاد الذهني اللي بيترجم للنسيان زي ما بتسرف في الأكل وبتتعب!

إزاي تتعلم بذكاء؟

عشان تتعلم أسرع من معظم الناس، محتاج تفهم عملية التعلم بتتم إزاي وتحط مجهود في الحاجة اللي هيساعدك فعلًا عملية التعلم بتتم على مرحلتين: استهلاك المحتوى، من خلال القراءة، مشاهدة الفيديوهات الغلطة الأولى اللي ٩٩٪ من الناس بتعملها إنهم بيركزوا بأكثر وبيحطوا مجهود كبير في النقطة دي المرحلة التانية هي هضم المعلومات اللي انت استهلكتها وتخزينها في ذاكرتك عشان تفضل معاك، المرحلة دي بتحدد مدة احتفاظك بالمعلومات دي، ودي محتاج تحط فيها مجهود أكبر.

الغلطة التانية اللي الناس بتعملها هي محاولة تذكر اللي بتقراه، الناس بتحاول تكون kim peek تذكر أي حاجة بتقراه جذاب، وفكرة إنك بتتذكر طريقة الوصول لمكان ما أو اسم شخص أو مكان معين حاجة كويسة ولكن مينفعش يكون هدفك الأساسي لأن المعلومات نفسها موجودة في الخرائط والكتب وغيره والذكاء الاصطناعي بيخليك توصل لخلاصة كتاب مكون من مئات الصفحات في دقايق!

Kim peek كان مثالي في تذكر المعلومات ولكنه كان غير جيد تمامًا في فكرة التحليل والوصول لحل لمشاكل وإيجاد طرق إبداعية للخروج من مشكلة ما وده مهارة مهمة جدًا جدًا في حياتك العملية والشخصية! فكرة إنك تلاقي حلول! لو وقعت في مشكلة تعرف تلاقي حل!

لذلك فكرة محاولتك إنك تفتكر حاجة موجود وممكن ترجعلها فكرة غير منطقية، زي المبرمج اللي بيتعلم binary code أو بيكتب الكود من الأول وهو عنده حزم ممكن يستخدمها النظام المثالي!

استراتيجية PACER للتعلم الفعّال

أنا تقريبًا مجال شغلي والبزنس الاونلاين اللي بدأته كان كله تعلم شخصي وكنت شغوف بالوصول لأفضل طريقة للتعلم خصوصًا إني مش عبقري يعني أنا عندي مشكلة زي ناس كتيرة في تذكر حاجات بتعلمها ومن أفضل الطرق اللي لقيتها خاصة بموضوع التعلم هي استراتيجية اسمها PACER واللي طلع بيها واحد اسمه Justin Sung وهو يوتيوبر بالمناسبة شرح PACER باختصار هي

• P for Procedural وهو الإجراء بمعنى إنك لازم تصنف المعلومات اللي بتقراها أو بتذاكرها، لو المعلومات دي محتاجة تدريب أو إنك تطبقها، لازم تطبقها في وقتها، ولو مقدرتش تطبقها متستهلكش عنها معلومات أكثر، ادخل على حاجة تانية. زي مثلًا لما بتكون بتذاكر برمجة وبتتعلم إزاي تبني برنامج بيحسب عدد السعرات الحرارية لشخص حسب هدفه بناءً على مدخلات زي عمره وغيره. منطقيًا، ده لازم يطبق لو قعدت تقرا إزاي تعمل كده هتبقى بتضيع وقت.
• A for Analogous وهنا تصنف المعلومة اللي بتتعلمها او بتقراها وتشوفها مرتبطة بحاجة إنت عارفها ولا لأ. مثلًا لو بتتعلم فرنساوي ووقعت قدامك كلمة زي soleil زي شمس ممكن تفتكرها ب so lay إنك قاعد بتاخد تان في الشمس وهكذا
• C for conceptual زي النظريات أو الدراسات اللي بتعزز من اللي بتتعلمه او بتقراه وشرح مفصل للي بتقراه ده بحيث تبقى فعلًا فاهمها وقادر تشرحها لحد معندوش أي علم تمامًا عن الموضوع، في حاجات ممكن تساعدك بشكل كبير في النقطة دي زي ال mind mapping الكتاب اللي بتقراه عمومًا فيه معلومات مسترسلة ولكن مش دي الطريقة اللي بيفكر بيها الكاتب، الكاتب عنده أفكار كتيرة مرتبطة ببعض بطريقة معينة وعشان توصلك فكرته بشكل أفضل لازم تربط الأفكار دي بحيث تبقى واضحة أكثر ليك وتربطها بتجربتك انت.
• E for evidence دي هتثبت المعلومة أكثر وأكثر ادي لنفسك دليل أو إثبات على اللي بتتعلمه بمعنى انت عملت mindmap وفهمت الحاجة كويس بشكل نظري ولكن ممكن تدي دليل عن ازاي الحاجة دي حصلت. لو بتعلم مثلًا إزاي ابيع في مكالمة برنامج معين وده اللي بنعلمه في الكورس فانت محتاج تقنع العميل بالبرنامج بتاعك بإنك بتقوله إن الخصم هيخلص بعد يومين وهناخد عدد معين من العملاء بس من غير ما تضغط عليه وبتأكد الكلام ده لأننا عندنا نوع من ال fomo فبنخاف تفوتنا الفرص كطبيعة بشرية وفي نفس الوقت متكونش بتضغط عليه لإننا مبنحبش اللي بيبع لنا وبيضغط حتى لو كان صادق، فهنا بتثبت الفكرة في دماغك لإنك مقتنع بيها
• R for Rehearsing وهنا ممكن تستخدم حاجات ممكن تثبت لك المعلومة زي Flash cards

الشخص الخبير بشكل عام في موضوع ما بيبقى فاهم طريقة ارتباط موضوع معين بحاجات تانية، يعني مثلًا لو انت مبرمج مبتدئ ممكن تشوف تعديل سطر كود معين في تطبيق كبير مش هيأثر على حاجة ولكن في الحقيقة انت ممكن تضرب كل حاجة لإن الحتة دي ممكن تسمّع في أجزاء تانية في نفس السيستم بل وسيستمز تانية متزامنة مع البرنامج ده، فخد وقت انك تعمل mind maps ممكن تستخدم تطبيق زي xmind أو miro أو حتى canva ومتحسش بالذنب إنك بتاخد وقت طويل في تثبيت معلومات قليلة بدل من تستهلك اكثر لأنك لو هتستهلك معلومات أكثر وبتنساها يبقى ملهاش لازمة. كل ما تقرا أكثر ممكن تعدل على ال mind map دي وتضيف عليها وممكن تستغل ال analogue اللي ذكرناه من شوية إنك تربط اللي بتتعلمه بمعلومات تانية ممكن كمان تشرح اللي بتتعلمه لحد من خلال صناعة المحتوى، والموضوع ده بيثبت اللي بتتعلمه أكثر في دماغك لذلك دايمًا بشجع الناس اللي بتتعلم حتى تصنع محتوى وده اللي بنعلمه في expertiseflow مش بس صناعة المحتوى ونشره لأ بنعلمك ازاي تستغل ده إنك تعمل فلوس من خلال خدمات مدفوعة

لو مهتم بالموضوع ده في bot عملته هيقولك ايه المحتوى المثالي المناسب لك... والخدمات المدفوعة.. ممكن تحصل عليه بشكل مجاني من هنا:

انت مش في سباق، متحاولش تقارن نفسك بحد، وركز في مذاكرة الحاجات اللي شايف انك شاطر فيها واستغل ادوات الذكاء الاصطناعي زي xmind او أي حاجة ممكن تضاعف انتاجيتك وكمان استغل فرصة إنك تعمل leverage إنك تعمل محتوى، تشرح للناس اللى ذاكرته او بتذاكره وفيما بعد تاخد مقابل مقابل ده!