السبب ده كافى إنك تقلل أو تقطع علاقتك بقرايبك

أنا مفكرتش فى السفر بسبب الأوضاع المادية، كان فى أسباب تانية أكبر وأهمها هو كرهى لعلاقة الناس بالفلوس وسلبيتهم تجاه محاولة أى شخص تحسين حياته

كام واحد من الناس اللى حواليك بيقول إن وضعه المادى هو نصيبه وده حال الدنيا والمفروض يرضى بيه؟ كام واحد من اللى حواليك بيقول على أى حد معاه فلوس حرامى؟ كام واحد بيقول على أى واحد راكب عربية نضيفة أمه جايباها له؟ كام واحد وسطنا عايش فى دور الضحية ومبيعملش حاجة غير إنه بيشتكى؟

أنا قللت علاقتى بناس كتير بل وقطعتها للسبب ده! فى أشخاص علاقتها سيئة جداً مع الفلوس.

دور الضحية متملك منها لدرجة إنها مبتعملش حاجة تماماً فى محاولة لتحسين وضعها

الحقيقة العقلية دى هى اللى هتخلينى وهتخليك محلك سر مش بس كوضع مادى، ولكن بشكل عام

الموضوع مش مادى نهائياً، أنا من أكثر الناس المقتنعة إن الفلوس هى وسيلة وليست غاية، الفلوس هى وسيلة للتحكم فى وقت شغلك وراحتك، وسيلة إنك تتصدق أكثر، تسعد الناس اللى حواليك، وسيلة لراحة البال

أنا إبتديت أحس بتحسن فى الوضع المادى لما غيرت علاقتى بالمادة أو مع الفلوس، علاقتى بالفلوس كانت سيئة جداً جداً زى الأمثلة من الناس اللى ذكرتها

فى شوية معتقدات صدقنى غيرت كل شىء

١- وضعك المادى إنت اللى مسئول عنه

زيه زى أى حاجة تانية فى حياتك، أنا لو دخلى مش مكفينى أنا اللى مسئول أحسنه سواء إنى أشتغل وظيفة تانية، أتعلم مهارة تانية مع شغلى الحالى. مفيش حد مسئول عن تحسين الوضع ده غيرى

٢- متقللش من قيمة نفسك

متقبلش بشغل حاسس إن العائد منه قليل( لو مكنتش مضطر عشان أحياناً بتضطر لفترة بس لازم تكون مدرك إنها فترة وحاطط خطة للنجاة).

متحسش بالذنب زيى زمان لما تعلى سعرك أو لما تطلب مقابل تجاه شغلك.

أنا كنت بحس بالإحراج وأسوء يوم بالنسبة لى وأنا بطلب زيادة من مديرى بعد سنتين أو أكثر إشتغلتهم بدون زيادة، ومكنتش بطلب إلا لما ببقى خلاص جبت أخرى.

طلبك حقك مش بجاحة! البجاحة إن حد يطلب منك حاجة ببلاش أو أقل من اللى تستحقه

٣- مش كل اللى بيطلب منك فلوس نصاب

للأسف فى نصابين كتير، ناس بيوهموك بحاجات مش حقيقية، بس مش معنى كده إن كل الناس بتعمل كده. فى ناس بتراعى ربنا فى أكل عيشها،. زى ما بتقدر قيمة وقتك، الناس بتقدر قيمة وقتها ولازم أنا وأنت نبقى متفهمين ده.

لازم نبقى متفهمين كمان إن مش بالضرورة هقدر أتحمل سعر أى شىء نفسى أشتريه.

فى حاجات هتبقى غالية عليا، وممكن يكون ده دافع قوى إنى أحاول أشتغل على نفسى بحيث أقدر أتحملها

وأخيراً، مش كل اللى معاه فلوس يا صديقى نصاب، ده عذر قبيح طلعه واحد قريبى وقريبك كسول مش عايز يشتغل عشان يدى لنفسه عذر لعدم إجتهاده.

فى ناس محظوظه وإتولدت فى عائلات غنيه، وفى ناس كذلك شقيت وإجتهدت وربنا كرمها.

واللى بيسعى ربنا بيديه

فى حاجة قلتها فى فيديو إمبارح لو متفرجتش عليه أنصحك تشوفه، والحاجة هى إن الكورس الحمد لله خلص على خير وتم نشره، ومازال سعره مخفض لفترة محدودة جداً

الكورس ممكن تشتريه من هنا

لو مش مستعد لشراء الكورس دلوقتى، ممكن تشترك فى القائمة البريدية للكورس فى نفس الصفحة وهتستقبل إيميلات فيها معلومات مجانية بشكل أسبوعى وكمان خليك متابع قناة اليوتيوب

أشوفكم فى الإيميل الجى

أخوكم أحمد الحديدى