🌙 خطة مضاعفة الإنتاجية خلال شهر رمضان

إزاى تنجز فى الشهر ده أكثرمن أى شهر تانى، بل وتوصل لشكل جسم أفضل!

فى ناس كتيرة بتاخد رمضان فرصة إنها تريح من الشغل، وأحياناً بيريحو تماماً من التمرين فى حين إن الشهر فرصة عظيمة جداً إنك تحقق كتير!

ده الروتين اليومى اللى بتبعه خلال شهر رمضان واللى بنصح أى حد يمشى عليه

وجبة السحور ضيف فيها نوع بروتين كازين أو بروتين بطىء الإمتصاص زى الجبنة القريش، الزبادى اليونانى أو حتى لو هتشترى مكمل وده لسببين

السبب الأول عشان يفضل فى عضلاتك لفترة طويلة وتقلل من حدوث هدم عضلى، والسبب التانى عشان متحسش بجوع، وبكلامنا عن نقطة الجوع، حاول تدخل فى وجبة السحور ألياف زى الفول والعدس والأفوكادو واللوز والتفاح...

 بعد السحور لحد صلاة الفجر، هو وقت مناسب لقراءة القرآن.

من ساعة لساعتين بعد صلاة الفجر هى أنسب فترة ممكن تركز وتنجز فيها، حاول تشتغل على الحاجات الأكثر أهمية فى يومك، أنا بخلص سعتها سكربت يوتيوب، أو بحل مشكلة مثلاً واقفة معاياً، بشكل عام بحاول أخلص الحاجات اللى هتطلب منى مجهود ذهنى.

 فترة الظهر وما بعدها، بتبدأ تحس بالجوع، وطبيعى مبتبقاش واصل لدرجة تركيز كافية تخليك تشتغل، سعتها ركز إنك تخلص المهام التى لا تطلب مجهود ذهنى، زى الرد على الإيميلات أو غيره.

وبتبقى فرصة تخلص ورد قرآن

 من العصر وحتى المغرب هى فترة مناسبة للقيلولة وحتى موعد الإفطار.

خلال وجبة الإفطار حاول تاخد بروتين سريع الإمتصاص، زى بروتين أيسوليت، وبكلامنا عن البروتين مهم تاخد إحتياجك من البروتين، من ١.٥-٢ جرام لكل كجم من جسمك، يعنى لو وزنك مثلاً ٧٠ كجم، ممكن تاخد ١٤٠ جرام بروتين. يفضل تقسمهم على ٣ وجبات (الإفطار والسحر ووجبة بينهم)

 بعد وجبة الإفطار ممكن تقرأ قرآن حتى التراويح، وبعد التراويح بييجى ميعاد التمرين. التمرين فى رمضان يفضل ميكونش طويل. أنا بركز إنى أوصل للفشل العضلى برفع وزن ثقيل طبعاً بعد تحمية كويسة

 بعد الجيم، بتبقى الدورة الدموية شغالة، فبيبقى مناسب جداً تذاكر أو تشتغل لمدة ساعة أو ساعتين رمضان الوقت فيه قصير، ولكن الوقت فيه بركة، وكل ما هترتب أولوياتك هتنجز أكثر.

مبارك عليكم الشهر الكريم 🌙

إن فى كتاب “إزاى تنشف وتضخم” لو حابب تعرف المبادىء الأساسية للتغذية وإزاى تحسب سعراتك، ممكن تطلبه من هنا:

أشوفكم فى الإيميل الجى

أخوكم أحمد الحديدى