محتاج تقرا ده، لو مفيش حاجة شغالة معاك

من يومين، نزلت بوست على يوتيوب، ذكرت فيه الأشياء اللي عملتها الحمدلله من يونيو 2024 حتى اليوم ده، والهدف كان توصيل معلومة للناس لتحفيزهم إنهم ما يوقفوش سعي ورا أهدافهم. في حد عمره 18 سنة علق وكتب الرد ده

الستة أشهر اللي هتحط فيهم مجهود وهتذاكر أو تشتغل فيهم بتركيز هيحولو حياتك! بس مش معناها إنك هتلاقي بالضرورة إنجاز ملموس فى نهاية المدة دى، خليني أشرحلك

لو حد عمره 18 أو 19 سنة، تقريبًا مجرش حاجة، ما يعرفش إيه اللي هو كويس أو وحش فيه، معندوش أي خبرة في أي حاجة، ففرصة إنه يحول حياته تمامًا في سنة بس والتحول ده يكون واضح جدًا، قليلة، لكن المجهود اللي هيحطه ده في نفس الوقت هيحول له حياته لو فضل مكمل ومشى بمبدأ الـ:

Iteration

أو إنه يشتغل كل يوم على مذاكرته أو هدفه المهني ويخطأ مرة واتنين و10 ويعدل من سلوكه... الخطوات الصغيرة دي بتتراكم على مدى بعيد ومش هتقدر تفهم ده إلا بعد فترة، الموضوع غير مرئي، زي لما بتحاول تخس وتعمل دايت، مش هتشوف جسمك بينزل كل يوم، هتقعد أسابيع متلاحظش نتيجة بعينك، لكن لو فضلت مكمل، على مدى بعيد هتشوف الفرق وهتعرف إن الفترة الطويلة اللي حطيت فيها مجهود دي ما راحت هدر.

الجميل إنك لما بتكبر في السن، إنجازك بيبقى أسرع بفضل الأخطاء اللي عملتها وانت صغير، لذلك فرصة تحقيقك لنجاح ملموس في 6 شهور بتزيد لما بتكبر.

أنا في سن 18 سنة كنت في نفس الوضع ده، وناس كتير هتفهم اللي بقوله.

الحل الوحيد إنك تبدأ وتخطأ. الأخطاء هى السبيل الوحيد لتحقيق أهدافك

هتعرف نفسك منين لو ما بتخطأش؟ هتعرف منين الشغل اللي بتحس بسعادة وانت بتشتغله لو ما جربتش؟

هتعرف منين المكان المناسب لك لو ما غامرتش وسافرت أماكن جديدة؟ هترتبط بالشخص الصح إزاي لو ما دخلتش في كذا علاقة فاشلة واتعلمت منها؟

الأخطاء نعمة وليست نقمة، العيب هو إنك تكرر الأخطاء دي وما تتعلمش منها، وأكبر عيب هو إنك تخاف تجرب أصلاً

أشوفكم في الإيميل الجاي.

تقبل الله صيامكم وطاعتكم وصالح أعمالكم.

أحمد الحديدي