إزاى تتعلم ١٠ مرات أسرع بشكل غير قانونى

أسوء طريقة ممكن تتعلم بيها هى إنك تقلد أو تتعلم أى شىء لمجرد إنه تريند. بتاخد المجال من الصفر، مروراً بالأساسيات لحد ما تتقنه وتحاول تتخصص فيه، دى أكثر طريقة غير فعالة خصوصاً فى وقتنا الحالى لأنك بتحاول تنافس حد أكثر منك كفاءة فى النقطة دى وهو الذكاء الإصطناعى. مستحيل تقدر تتذكر كل شىء، مستحيل تقدر تبقى متخصص أكثر منه.

فى شركة كانت ماسكة الwebsite بتاعى وكنت بدفع لها ٣٠٠ دولار شهرياً لمجرد إنهم يحسنوا الموقع وينزلوا أى تعديلات بطلبها. الموقع مكتوب بـphp وأنا لا أفقه عنه شىء. مشتغلتش php قبل كده.

اختلفت مع الشركة وكنسلنا العقد، وفى مرة كنت عايز أحط كتب على الموقع وأعمل تعديلات تانية. عملت ده فى خلال ساعة! عشان أوصل للمستوى ده بدون استخدام Grok كنت محتاج أسبوعين مثلاً.

فى tool اسمها Replicate بتقدر تديها صورة مصغرة لفيديو خاص بيوتيوبر معروف وتديها صورتك وهتحط صورتك مكانه فى ثوانى وتقدر تعدل على الصورة زى ما إنت عايز. إنت ممكن تدفع لـgraphic designer ١٥ ولا ٢٠ دولار على الصورة، والموضوع إنت مكلفكش أى حاجة! عشان توصل للمرحلة دى وتصمم الصورة بالشكل ده محتاج أسابيع وشهور. الموضوع يبدو غير قانونى.

ولكن...
هل الذكاء الإصطناعى هينقذك لو مكنش عندك علم تماماً بالبدائيات؟ أو لو حد مثلاً عمره ما كتب كود يقدر يطلع حل المشكلة الأخيرة؟ أكيد لأ. لازم يعرف على الأقل يوجهه.

البرنامج اللى هتعمله من الصفر بالذكاء الإصطناعى، لازم يكون access على الكود بتاعه وفاهم ازاى تعدل فيه فى حالة حدوث أى شىء.

الحل الأفضل حالياً هو إنك تبقى فاهم الأساسيات، تتخصص فى الأول لحد ما تقدر تدخل فلوس من تخصصك، بعدها لا تبذل مجهود كبير فى الوصول لمستوى احترافى فى تخصص معين، ولكن تعمم فى أشياء حوالين تخصصك واستخدم الذكاء الإصطناعى فى تغطية نقاط ضعفك، وصدقنى الاستراتيجية دى فعالة بقوة معايا وفى أى مجال!

أنا فضلت متخصص ١٠ سنين كمبرمج، ومن خبرتى وفى ظل اللى بشوفه حالياً، أفضل شىء لمواكبة التطور ده وتعلم أى شىء بشكل سريع والوصول لتقدم ملحوظ لدرجة إن الموضوع يبدو كأنه غير قانونى هو إنك تعمل reverse engineering.

تشوف إنت عايز توصل لأيه؟ وتبدأ تشوف الحاجات اللى هتوصلك للهدف ده.
على سبيل المثال، أنا عايز أصنع محتوى بحيث يبقى بداية إنى أكسب فلوس فى حاجة بحب أتكلم فيها.

المشكلة اللى هتواجهنى فى البداية هى إنى مش عارف أعمل محتوى عن أيه؟ أتكلم إزاى؟ أنشر على أى منصات؟
أيه هى نقاط القوة عندى من ناحية خبراتى ودراستى بحيث تدينى ميزة تنافسية عالية؟ دى كلها حاجات واجهتنى فى البداية ولو كنت مشيت بمبدأ التجربة بنفسى كنت هضيع وقت. لذلك استخدمت الذكاء الإصطناعى وعملت bot خاص بالجزء ده بيسألك شوية أسئلة وبيقولك أنسب نوع محتوى مناسب لك.

https://forms.fillout.com/t/frtyq3KA6Mus

العصر الحالى هو عصر الإبداع، هو عصر الاستغناء عن المهام الروتينية المملة وتوكيلها للذكاء الإصطناعى أو أشخاص عايزة إنها تفضل محصورة فى الجزء ده.

أشوفكم فى الإيميل الجى
أخوكم أحمد الحديدى،،