حياتك هتتغير لما تفهم ده

كل الشركات وحتى الأفراد بيبذلوا كل اللي في وسعهم عشان يشتتوا انتباهك، الانتباه ده بيترجم عندهم لفلوس. إزاي؟

لما بتشوف فيديو معين، تم إخراجه بشكل احترافي بحيث يكون فيه مؤثرات صوتية وبصرية تخليك تكمّله للآخر، هيقنعك بشكل ما إنك تشتري اللي بيروّج له. في اجتماعات بتتعمل وفلوس بتتدفع بالملايين عشان العملية دي تحصل. أنا صانع محتوى بقعد بالساعات أقرأ وأحيانًا باخد كورسات عشان أتعلّم أجذب انتباهك إزاي.

لو إنت مش متحكم في الشيء اللي بتديله انتباهك، إذن إنت تم السيطرة عليك، هتدخل في دوامة استهلاك لنوع المحتوى ده، سواء كان صناع محتوى تافهين، أكل غير صحي، أو محتوى إباحي!

من جواك بتبقى عايز توقّف، بس مش قادر! لا إراديًا ماسك التليفون ومش قادر تسيبه، بتدخل الحمام معاك التليفون وعملت تقلب في فيديوهات قصيرة، بتبقى عايز تنام ومش قادر تسيب التليفون، عارف إن البنت اللي بتتفرّج على صورها مش عارفة إنك موجود أو مش مهتمة بيك تمامًا، وبالرغم من كده عمال تقلب في صورها. ليه مش قادر توقّف؟!

لأنهم وصّلوك لمرحلة إدمان استهلاك المحتوى ده. والحل الوحيد عشان تطلع من حالة الإدمان دي هو إنك تجاهد نفسك لحد ما تقدر تسيطر على دماغك وتحدد بالظبط هتوجّه انتباهك لإيه.

منصات التواصل الاجتماعي في ناس بتشوفها نقمة، لأنهم مستهلكين! منصات التواصل الاجتماعي ممكن تحول حياتك لو استغليتها لصالحك وتحوّلك لمنتج بدل ما تكون مستهلك بيتم استغلاله عشان يدفع اللي في جيبه مقابل مسببات سعادة قصيرة!

قد يكون الإيميل ده سبب إنك تاخد خطوة في الاتجاه ده، ولو ربنا كرّمك وخدت الخطوة فعلاً فده تذكير ليك إنك تفضل مكمّل.

أشوفكم في الإيميل الجاي

أخوكم أحمد الحديدي