لو عملت ال ٥ الحاجات دى هتعمل شىء إستثنائى فى ال ٩ شهور الجاية

هقولك المبادىء اللى لو إتبعتها السنة دى، هتحقق أكبر إنجاز فى حياتك

أنا أكثر واحد بيعارض كتب التنمية البشرية النصب، ولكنى مؤمن بطرق تطوير الذات المنطقية والعملية واللى أنا عشتها وطبقتها لذلك هقولك أمثلة من حياتى الشخصية

المبادىء دى مش بس حسنت وضعى مادياً، ولكن غيرت نفسيتى وخلتنى مقبل أكثر على الحياة وبتطلع لكل يوم وكلى شغف. بستمتع باللى بعمله فى دوامى الكامل وكمان الشغل الخاص .

المبادىء دى لو مشيت عليها أنا متأكد هتحقق شىء تفخر بيه خلال ال ٩ شهور الجية

1. الوضوح فى اللى عايز توصله

فى ناس لو سألتها عايز تعمل ايه السنة دى هيقولك، عايز أسافر وأدرس بره، أو عايز اهاجر. أو عايز أحسن الأنجليزى، أو عايز أبدء بزنس واعمل فلوس.

اللى هيمنعك من تحقيق هدفك هو عدم وضوحه. إنت عايز تسافر فين؟ وتدرس ايه؟ وجامعة أيه؟ وتسافر أمتى؟ وأيه متطلبات السفر؟ ولما تسافر هتعمل أيه؟ أيه العائد اللى هتاخده من الدراسة؟

لو قلت عايز أسافر وخلاص، ببساطة هتبقى مش فاهم المفروض تعمل ايه

عايز تحسن الإنجليزى، توصل للمستوى الكام؟ فى وقت قد ايه؟ وأيه الهدف من ده؟

عايز أبدء بزنس وأعمل فلوس..طيب أى نوع بزنس؟ تعمل فلوس كام وفى خلال قد أيه.

فى الثانوية كان حلمى أسافر دولة أجنبية، بس مكنتش عارف فين، نفسى أسافر أعيش فى اوروبا او امريكا وخلاص. فى نفس الوقت، أنواع البزنس مختلفة وعلى فكرة كلها بتجيب فلوس لو ركزت، بس مختلفة عن بعضها من ناحية آلية دخولها وتدويرها

فلازم توضح هدفك بالظبط، تقسمه لأهداف صغيرة وكل هدف منهم تحط ليه مدة زمنية منطقية تبدأ تشتغل عليها لحد ما توصل للهدف الكبير

وده اللى بينقلنى لنقطة مرتبطة بجزء الوضوح، وهو إيمانك بنفسك وإنك قادر على تحقيق الهدف اللى عايز توصله. فى أوقات كتيرة كنت بشتغل على حاجات بجد ولكن من جوايا مكنتش مصدق إنى هوصل لها أو حاسس إنى مستهالهاش.

صدقنى مكنتش بوصل لها. بسبب عدم إيمانى بنفسى مكنش بيخلينى أحط المجهود المطلوب فعلاً لتحقيق الشىء ده. لو بحاول أخسر دهون فى أوقات مكنتش بصدق إنى ههاجر، مكنتش بتابع أخبار الهجرة واللى متأكد منه إن كان فى أوقات أبواب التقديم كانت فاتحة فيها وفاتتنى لأنى تخاذلت، زى اللى مش مصدق إنه هيوصل لجسمه المثالى، فى لحظة ضعف ممكن آكل وجبة ممكن يضيع كل عجز السعرات اللى عملته خلال الأسابيع السابقة وهيخليه ميوصلش للنتيجة، فإيمانك بنفسك هو عامل كبير فى المعادلة.

٢- الحاجة التانية وهى خروجك من وضع الأوتو بايلوت

فى أوقات بتبقى محتاج توقف! متشتغلش أو توقف تقليب على السوشيال ميديا وتقعد مع نفسك تفكر فى اللى بتعمله، تسأل نفسك أسئلة وتجاوب عليها إجابات صريحة وواضحة عشان الردود دى هى اللى هتوضح مسارك. أنا مكنش هدفى إنى أكمل دراسة يعنى ماستر وكده بعد الجامعة، وكنت عايز أسافر أمريكا أو كندا بس هجرة مدرسش، لقيت فرصة إنى أعمل ماستر فى أمريكا فى ٢٠١٩ قبل الكرونا وقدمت ودخلت امتحانات واتقبلت.

لو كنت كملت وسافرت معرفش المسار كان هيودينى لفين، بس عموماً مكنش ده تبع خطتى، جت الكرونا وسعتها بدأت أفكر واذكر نفسى بخطتى، هل اللى هعمله دلوقتى هيقربنى من اللى انا عايزه؟ لو رحت امريكا هروح على فيزا طالب، وهبدأ من الأول بعدها لسه هدور على شغل، وبعد كده أسعى فى التقديم على الجرين كارد. هل ده اللى المفروض أعمله ولا اركز فى موضوع هجرة كندا؟

أحياناً بيجيلك مغريات زى شغل مثلاً بمرتب كويس مش هيخليك تمشى فى نفس المسار الوظيفى اللى عايز تكمل فيه، أو ييجى فى ايدك فلوس بدل ما تخليها معاك عشان تسافر أو تاخد كورسات تروح تجيب بيها عربية والمغريات دى بتخرجك تماماً عن مسارك لأنك فى وضع الأوتو بايلوت

وهنا بتيجى أهمية إنك توقف وتفكر فى اللى هتعمله، هل هيوصلك للهدف الأكبر ولا لأ؟

٣- الحاجة التالتة، هى تقليل الوقت اللى بتاخد فيه القرار

إحنا بنخلص دراسة عندنا ٢٢-٢٣سنة على عكس الناس برة فى أمريكا واوروبا اللى ممكن ميدخلوش جامعة ومعاهم وقت أطول يسافرو أو يضيعو وقت غير الظروف والبيئة الأفضل اللى بتخلى الشخص العادى هناك ظروفه أحسن من شخص متوسط أو فى المتوسط عندنا من ناحية الماديات والمعيشة.

لذلك لما بتتخرج معاك تقريباً ٧ سنين لحد ما تتم ٣٠ سنة لو إتخرجت من كلية عادية، فمحتاج متكونش بطىء فى قراراتك، لو جت لك فرصة، إستخير ربنا ولو مرتاح دوس، حتى لو غلطت، هتتعلم من غلطك.

ولو ظبطت ممكن تغير حياتك. فى ٢٠١٩ كنت شغال مع شركة سعودية وجالى عرض دبى، ناس كتيرة قالت لى المرتب مش كبير وميستاهلش تروح طالما مرتاح فى شغلك.

الحقيقة أنا مكنتش بفكر فى المرتب على قد ما كنت بفكر فى التجربة الجديدة والنقلة لأنى عارف الحياة فى دبى ممكن توفر فرص أكثر. رحت والحمدلله إنى خدت القرار ده، لأن دماغى إتغيرت تماماً وعدلت مسارى لما جيت هنا وإحتكيت بناس فتحت عينى على الحاجات الممكنة اللى مكنش حد بيتكلم فيها فى السعودية ومصر من ناحية البزنس وفرص تحسين وضعك المادى وكمان طريقة تفكيرك.

فخليك سريع فى قرارك ومتنامش على الموضوع زى ما بيقولو

٤- الحاجة الرابعة - خليك جدى فى أهدافك

لو عايز تحس بتقدم فى حياتك، لازم تاخد الموضوع بجدية، مينفعش تمشى بشكل عشوائى، لازم تخطط ليومك، وكل حاجة هتعملها فى يومك تكون هتوصلك للهدف الشهرى لحد ما توصل لهدفك فى نهاية السنة. فى نفس الوقت محتاج تقيس! محتاج تقيس سعرات اللى بتاخدها خلال اليوم لو عايز تخس، محتاج تعرف انت محتاج كام جرام بروتين، محتاج تعرف إنت وصلت لأى مستوى فى اللغة، بتقدر تتكلم وتفهم الناس ولا لأ متبقاش بتذاكر وخلاص. محتاج تكتب كود وتشوف كفاءه الكود بتاعك.

هتعرف منين إذا كنت بتتقدم تجاه هدفك لو مكنتش بتقيس تطورك، قياس تطورك مع الإستمرارية هتوصلك لهدفك

٥- الحاجة الخامسة - مفيش طريق واحد

مفيش طريق واحد، فى طرق كتيرة، واللى محتاج تعمله إنك تركز على طريق واحد. فى ناس بتبقى عايزة تنجح، بتذاكر كذا حاجة، بتدخل فى كذا بزنس ال FOMO أو خوفها ان يفوتها حاجة ممكن تخليها تنجح أو تعمل فلوس اكثر. المشكلة إن دخولك فى كذا حاجة هيوصلك لمرحلة ال burn-out ومش هتكمل.

زى ما قلت مفيش طريق واحد للنجاح، فى كذا طريق فمحتاج تمسك مسار وتكمله للاخر. مفيش حد نجح وفى بدايته بدء فى كذا حاجة مع بعض. لازم تتخصص وتركز فى حاجة واحدة فى الأول لحد ما تنجح، بعدها تبدأ تتشعب

أشوفكم فى الإيميل الجى

أخوكم أحمد الحديدى