بالطريقة دى بحارب التشتت

في أوقات بتبقى عارف إنك محتاج تشتغل، محتاج تذاكر. الموضوع مهم وممكن تكون ابتديت تذاكر فعلاً، ولكن مش قادر تتحكم في نفسك .. بتمسك الموبايل وتعمل scrolling.

انت مش عارف انت بتعمل كده ليه، مش قادر توقف.. الحقيقة إن الموضوع زيه زي مواضيع من نوع العادة السرية، التدخين وغيرهم. عشان توقفهم محتاج تلعب ألعاب عقلية أو mental games.

محتاج تبقى مدرك وانت على وشك فعل الشيء ده، أحياناً بيبقى مطلوب أكتب سكربت يوتيوب أو أقعد أبني حاجة خاصة بالبزنس، وأول ما بفكر إني أمسك الموبايل، بكرر في نفسي إن تكلفة التشتت لمدة ربع ساعة أو أكثر هي إني بضيع أحلامي! حرفياً... مش الربع ساعة نفسها، ولكن انجرافي في عادة الإدمان نفسها وتراكم الربع ساعة اللي هضيعها بشكل يومي هتكون ضيعت مدة طويلة ممكن أستغلها إني أعمل شيء أفيد! أفيد لصحتي، أفيد لعيلتي، أفيد إني أعمل فلوس...

المشكلة إننا غير مدركين للي بيحصل حوالينا، المشكلة إننا زي الروبوتات وبنجري ورا إحساسنا اللحظي وبنتصرف بناءً عليه.

التحكم في نفسك وتهذيبها، فهمك لدماغك وإزاي تتعامل معاها، هو اللي هيخليك تمنع أي شيء هيقلل من احترامك لنفسك أولاً، وهيضيع عليك وقت قد يبدو قليل يومياً ولكنه مدة كبيرة لو تراكمت، وممكن تعمل خلالها شيء مختلف يأثر على حياتك.

وتذكير سريع، الإيميلات اللي ببعتها لا أدعي فيها الكمال، ولكنها مشاركة تجربة لعل وعسى تفيد حد، وصدقوني بتبقى تذكير ليا.

بتمنى لكم التوفيق،
أحمد الحديدي،،