!إزاى تبقى حازم، مقنع وواثق من نفسك أكثر - How to be more assertive!

أو موضوع مستخدم بطريقة مستهلكة عشان يجيب مشاهدات أو يشد الإنتباه، ^_cliché الموضوع ده مش

أنا مش هكلمك عن حاجات ساذجة صناع محتوى بيتكلمو فيها، زى إنك تكون شاب مقطع السمكة وديلها وتبقى واثق من نفسك وتجذب البنات، أو إزاى تخلى الناس تثق فيك فتعمل مليون دولار فى خلال سنة.

أنا هكلمك فى شىء منطقى هيخلى الناس أولاً تحترمك كشخص، هتقدر تحط حدود معاهم بحيث محدش يفكر يتجاوز ويفكر إنه هيخليك تعمل حاجة إنت غير مقتنع بيها، كمان الناس هتخدك على محمل الجد، بالتالى هتثق فيك، وبالتالى لو كنت عايز تقنعهم بشىء أو تبيع حاجة هتزود فرص نجاحك فى تحقيق ده

وأيه معناها أصلاً؟ Assertive ليه إستخدمت مصطلح

إستخدمت الكلمة دى لأن ترجمتها بالعربى محتاجة شرح شوية، فى نفس الوقت لو حبيت تقرا عن الموضوع أكثر تبقى عارف هتدور بأيه

طيب معناها أيه بالعربى؟

الكلمة معناها إنك تكون واضح جداً ومحدد فى طريقتك لعرض فكرتك أو الحاجات اللى إنت مؤمن بيها بدون لف ودوران ، تكون حكيم فى تعاملاتك مع الناس، مبتديش للناس أولوية عنك، وفى نفس الوقت تكون شخص لطيف غير عدوانى فى طلب ذلك، وبتحسس الناس إنك بتحترمهم، بتقول اللى عايزه بإحترام

وضوحك فى التواصل مع الناس مهم جداً وبتطلب اللى إنت عايزه بدون تلميح، بمعنى أصح دوغرى.

على سبيل المثال، فى مبرمجين إشتغلت معاهم كانت بيتزنقو فى تاسك معينة، فبدل ما يطلبو وقت زيادة ويصارحو بضيق الوقت، بيلقو اللوم على الآخرين إنهم السبب فى تأخيرهم.

بجانب ذلك تكون واثق من نفسك وقت طلبك لحقك بدون ما تكون مهزوز، مش محتاج تتعلم أى لغة جسد غير إنك تبقى بتبص بشكل مباشر للشخص اللى بتكلمه بجانب إن تكون نبرة صوتك ثابته

فى نفس الوقت تبين إحترامك للناس، أحياناً لو بتطالب بحقك ولكن بتوصل للشخص إنك بشكل ما بتقلل منه ممكن توصله لمرحلة العناد ومش هتاخد اللى انت عايزه

الناس مبتحبش الشخص اللى بيحاول يرضى أى حد، لأن لو كل الناس بتحبك يبقى فى حاجة غلط.

مش لازم كل الناس توافق عليك لذلك من صفات الشخص ده إنه بيقول لأ لاى شىء هيأثر عليه بالسلب

هنا بتحط حدود مع الناس ولا محالة الناس هتحترمك على الشىء ده. زى مثلاً لو كنت شخص غير مدخن وحد دخن سجارة جنبك، أو شتم جنبك أو إستهزء بشغلك أو أهدافك. لازم تتكلم

الموضوع ده صدقنى بينفع لو كنت موظف فى شركة، بيبقى فى حدود ما بينك وبين مديرك، وقبل ما يفكر إنه ييجى عليك فى شغل، هيبقى فاهم شخصيتك ورد فعلك. أنا دخلت الجيش، وفى ناس فى دفعتى كانو بيتشتمو بالأب والأم! ليه فى شخص ممكن يعمل كده مع ناس وناس لأ؟ مع إننا كلنا بنى آدمين.

بس فى ناس بتحط حدود، وقبل ما الشخص التانى يفكر يتجاوز حدوده، بيبقى متأكد أو متوقع رد فعل الشخص تجاهه. الموضوع بينفع لو مسكت تيم فى شركة، لو كنت شخص بتهزر فى وقت جد والعكس، الناس هتخدك على محمل الجد ازاى؟

الأهم لو كنت بتبيع، الموضوع ده بينفع جداً لو داخل مكالمة مع شخص بتحاول تقنعه بخدمه بتبيعها، لو قدرت تدير الحوار، تعرف إمتى تكون جد، إمتى تلطف المكالمة، وإمتى تعترض فى حال تجاوز الشخص حدوده، فرصتك فى تحقيق مكسب هتزيد. وده اللى اتعلمته من خلال أكثر من ٣٥٠ مكالمة عملتها عشان أبيع فيها برامج تدريب وتغذية غير المواقف اللى اتعرضت لها فى الشغل

حاول تقرا أكثر عن الموضوع ده، صدقنى هيفرق معاك بجانب الجزء التقنى

ممكن أعمل له حلقة منفصلة على اليوتيوب وندخل فى التفاصيل

أنا بعتذر على اللينك الخاطىء للتسجيل فى قائمة الإنتظار اللى بعته أمس

…ده اللينك الصحيح

أشوفكم فى الإيميل الجى

أخوكم أحمد الحديدى