حل الإحتراق الذهنى

بترجع من الشغل مستهلك...
مش قادر حتى تفكر تعمل أي حاجة
ده كان أنا… شغال من 9 لـ 5 كمبرمج، وبرجع كل يوم حاسس إن مخي كان في خلاط.
والأسوأ؟ إني لازم أصحى تاني يوم وأنزل الشغل…
وانا أصلا معنديش أي طاقة.
كنت عايز أطور من نفسي، أذاكر بعد الشغل وأشتغل على البزنس بتاعي… بس مفيش طاقة.
الغريب إن السبب مش اللي إنت فاكره… ولما فهمته حياتي اتغيرت 180 درجة.

كنت فاكر إن الإرهاق سببه إني بشتغل ساعات طويلة.
لكن يومي كان بيبدأ كده:
٩ الصبح — جاهز أكتب كود.
٩:٠٢ — رسالة على سلاك.
بعدها إيميلات…
بعدها ميتنج…
وبعدها ميتنج تاني عشان نفس الميتنج اللي فات.
على الغدا؟ مكنتش حتى كتبت الكود اللي أنا متوظف عشانه.
وعلى الساعة ٦؟ ولا إنجاز يحسب
كنت حاسس إني طول اليوم في معركة… بس من غير أي انتصار.

قرأت عن الموضوع و سمعت بودكاست ل Cal Newport كاتب كتاب Deep work وهو مبرمج أيضاً وبروفسير في جامعة Goergetown
قال إن الاحتراق في الشغل العقلي مش معناه إنك بتشتغل كتير…
هو معناه إنك بتقضي يومك كله في نوع الشغل الغلط.
كل مرة تقول "أيوه" على تاسك، إنت مش بس وافقت على التاسك…
إنت وافقت على كل الوجع اللي وراها — رسائل، تحديثات، خيوط نقاش مالهاش نهاية.
والمصيبة؟ لما يكون عندك 10 أو 20 مشروع كده، فجأة يومك كله بيبقى كلام عن الشغل… مش الشغل نفسه.
والتنطيط بين المهام بيحرق دماغك حرفيًا.

تخيل تبقى لعيب محترف وتقضي ٦ ساعات قبل الماتش في نقل أوزان ملهاش أو عمل حاجات ملهاش علاقة بتمرينك.
لما تيجي الماتش الحقيقي… خلاص طاقتك خلصت.

الحل المثالى هو اتباع Thoreau schedule وهو فيلسوف طلع بنظام مثالى اتبعه ناس كتيرة مبدعة لسنين..

• الصبح: ساعتين أو ٣ شغل عميق — مفيش Slack، مفيش Teams، مفيش إيميل.
• نص اليوم: ساعة أو ساعتين راحة — مشي، جيم، قراءة
• العصر: ساعة أو ساعتين شغل— اجتماعات، متابعة، إيميلات.

وبعدين أقفل اليوم.

منطقياً مينفعش نمشى بالروتين ده حرفياً لأننا طبيعة شغلنا تحتم إننا نشتغل ٨-١٠ ساعات، ولكن فهمت الفكرة. فكرة التركيز، إزالة المشتتات وانك تفصل كل ٥٠ دقيقة لساعة.

دى خطوات هتحل المشكلة جذرياً:

1. حدد مهمة واحدة واضحة وخلّيها قدامك.
2. اقفل كل مصادر الإزعاج (موبايل في أوضة تانية، وضع عدم الإزعاج، إخفاء الإشعارات)
3. خلي شغلك full screen ، واقفل أي شاشات تانية.
4. حدد مواعيد ثابتة ترد فيها على الرسائل (مثلا ١١:٣٠ و٤ العصر)
5. أي فكرة أو إغراء يجي في دماغك، اكتبه في مكان واحد، وبعدين كمل شغلك.
6. المتصفح يكون بس للشغل، وعدد التابات أقل من ٥.
7. اشتغل على فترات ٥٠ دقيقة تركيز و١٠ دقايق راحة.
8. شيل أي حاجة بتشتتك قبل ما تبدأ.
9. لو حاجة بتعطلك دلوقتي، خلصها… لو مش مهمة، سجلها وتعامل معاها في وقتك المحدد.
10. اقفل يومك وأنت كاتب هدف بكرة.
11. راقب نفسك كل أسبوع وعدل الخطة لو لقيت تسريبات.
12. في الأول، الناس لاحظت إني مش برد فورًا على أي رسالة.
    الإنتاجية زادت…
    جودة شغلي اتحسنت.
    كنت بعمل الشغل اللي أنا متوظف عشانه… ولسه عندي طاقة آخر اليوم.
13. لو إنت مرهق بعد شغلك، ممكن السبب مش إنك مش قادر تشيل الشغل…
    لكن إنك محبوس في نظام بيحرق انتباهك في الحاجات الغلط.