أنا مش أكتر واحد ناجح في الدنيا ولا أكتر شخص حقق إنجازات ممكن تسمعله، بس أنا متأكد إنى الشخص اللي هيقولك الكلام اللي محتاج تسمعه. أنا غيرت حياتي، غيرت هويتي. كان ممكن أبقى في مكان مختلف تمامًا لو فضلت ماشي على البلد اللي اتولدت فيها، أو الناس اللي حواليا، أو حتى على حسب شهادتي. غيرت شهادتي. غيرت المكان اللي عشت فيه. حتى شكلي قدرت أغيره. قدرت أغير الحاجات اللي ماكنتش راضي عنها. ومش بقولك كده عشان أبان، أنا بقولك عشان يكون عندك سبب تسمعني. لو عايز تغيّر حياتك في الشهور الجاية، في شوية حاجات لازم تبدأ بيها: لو هنحصر اللى احتجت أعمله واللى أي حد محتاج يعمله في شيء واحد فقط، فهيبقى الإلتزام. لو مكنتش شخص ملتزم، فأى كلام أي حد هيقوله لك هيبقى بدون فايدة. الإلتزام بـ ٣ حاجات في حياتك:
• مهني
• روحي
• شخصي (صحتك) في ساعتين يومياً على الأقل لازم محدش يتدخل فيهم. الساعتين دول بتشتغل فيهم على هدفك سواء مذاكرة أو شغل. لو سمحت لأى حد يتحكم فيهم، يبقى انت اديته الفرصة يتحكم في مستقبلك (ولازم تبقى بالجدية دى). اللي يخليك دايمًا فاكر هدفك إنك تبص للناس اللي بتلهمك. وترجع دايمًا للحاجات اللي بتملالك روحك وبتخليك مبسوط. الحاجة اللي لما تعملها تنسى الوقت. ممكن فيديو لشخص بيلهمك وبتحب تتفرج عليه، بيفكرك بهدفك، ممكن كتاب، حتى فيلم. الصلاة فرقت معايا جدًا في كل فترة كنت عايز أرتقي فيها. بتخليني أهدى، أذاكر وأشتغل في سلام. الصلاة بتخليك consistent، وبتديك طاقة تكمل. الصلاة بتريح قلبك وبتخليك مكمل وانت مطمئن، عندك ثقة في ربك أولاً إنك هتوصلك وفى نفسك إنك قادر.. هيبقى عندك جلد وصبر إنك تكمل. اتمرن يومياً، لازم تتحدى نفسك جسدياً. ده بيقويك وبيخلى عندك صبر وإحتمال إنك تفضل مصر على تحقيق أهدافك وتتحدى الصعوبات اللى لا محالة هتواجهك. اكتب أهدافك أسبوعيًا زي ما قلنا. خطط لليوم اللي جاي. واستخدم time blocks. يعني ساعتين full focus وتنجز. مش سهل في الأول بس بالممارسة هتعرف. هتلاقي نفسك ساعات عايز تغير خطتك بسبب كمية المحتوى اللي بتتعرض له. وسؤال بيتكرر معايا في الكونسلتشنز: ناس تفكر تسيب مجال كامل بسبب فيديو أو تعليق شافوه. صدقني… مفيش وظيفة أو تخصص بيختفي فجأة. ممكن ياخد عقود. فكمل اللي بدأته. حتى لو مش هتستخدمه بعدين. هيفيدك بشكل أو بآخر. ده اللى انت محتاجه، لو كنت كسول، هتدور على أي طرق سريعة عشان توصل لهدفك... الحقيقة مفيش طريقة سريعة. لازم تمر بخطوات معينة عشان توصل (الكلام تذكير ليا قبلك). لو حابب تتفرج على الفيديو كامل، ممكن تشوفه من هنا:
https://www.youtube.com/watch?v=2rx8QYIjFkQ&t=2s أشوفك في الإيميل الجى أحمد الحديدى، | 